ཀྭ་ཡེ། ཇོ་ལགས་ཟླ་བ་ལགས། ཁྱེད་ཀྱིས་ཟས་སུ་གང་བཟའ།
ཟླ་བས་བཤད་པ། “ངས་སྒོ་ང་བཟའ་ཡི་ཡོད།”
སྒོ་ང་རྣམས་གང་ན་ཡོད།
ཟླ་བས། “དེ་ཚོ་ཅོག་ཙེའི་སྟེང་དུ་ཡོད།”
ཅོག་ཙེ་གང་དུ་་ཡོད།
ཟླ་བས། “མེས་བསྲེགས་ཚར་སོང་།”
མེ་གང་དུ་ཡོད།
“ཆུས་འཇིགས་པར་བྱས་སོང་།”
ཆུ་གང་དུ་ཡོད།
“བ་ཕྱུགས་ཀྱི་འཐུངས་ཚར་སོང་།”
བ་ཕྱུགས་གང་དུ་ཡོད།
“ས་གཞིའི་ནང་དུ་ཡལ་སོང་།”

གལ་ཏེ་ཁྱེད་ཀྱིས་འདི་སྒྲུང་གཏམ་ཞིག་ཡིན་པར་ངོས་ལེན་ཞུ་ཐུབ་ཀྱི་ཡོད་ན། འདི་ལྟ་བུའི་བཅོས་སྒྲུང་དུ་མ་ཞིག་བདག་གི་རྨོ་མོ་གཙོས་པའི་ཨ་མས་ཀྱང་ང་ལ་ཡང་ཡང་བཤད་ཀྱི་ཡོད། སྒྲུང་དེའི་ནང་ལ་འཁྲབ་སྟོན་པ་གཙོ་བོ་ཞིག་དང་། རྙོག་ཟིང་། དེ་བཞིན་ངོམ་ཞིང་ཚིམས་པའི་གོ་རྒྱུ་ཡོད་པའི་བསླབ་བྱ་ཞིག་ཀྱང་མེད། དེ་ལྟ་བུའི་སྒྲུང་རྣམས་ཁོ་བོ་ལ་ཆུང་དུས་སུ་རྒན་རབས་ཚོས་བཤད་ཀྱི་ཡོད།

གུས་པས་གང་ཤེས་སོང་ཞེ་ན། ཁྱད་མཚར་བ་དང། གོ་རྒྱུ་གཏན་ནས་མེད་པ། དེ་བཞིན་དགོས་པ་དང་རྒྱུ་མཚན་གཏན་ནས་མེད་པའི་བཅོས་སྒྲུང་ཞིག་ཡིན་ན་ཡང་། སྒྲུང་ནི་མི་རྣམས་ཀྱི་སྒལ་ཚིགས་དང་། སྙིང་། གློ་བ། དེ་བཞིན་དབུགས་ལྟ་བུ་ཡིན། གཅིག་བྱས་ན་རྒྱུ་མཚན་གཏན་ནས་མེད་པའི་སྒྲུང་གཏམ་རྣམས་གང་ལས་གནད་གལ་ཆེ་བ་ཡིན་སྲིད། གནའ་སྔ་མོ་བོད་དུ་རྒྱལ་སྲིད་སྐྱོང་ཚུལ་ཞིག་ནི་སྒྲུང་གཏམ་བཤད་སྟངས་ཤིག་གི་ཐོག་ནས་བསྐྱངས་ཀྱི་ཡོད་པར་ཐོས།

རང་ཉིད་ཕྲུ་གུ་ཞིག་ཡིན་པས་རང་རྒྱུད་ལ་སྒྲུང་གཏམ་དེ་ཚོས་བག་ཆགས་མཐུག་པོ་ཇི་ལྟར་བཞག་ཡོད་མེད་ད་ལྟ་གཞི་ནས་ཤེས་སོང་། བཅོས་སྒྲུང་དེ་ལ་བརྟེན་ནས་བདག་གིས་ཆེད་དུ་དམིགས་ནས་མཚན་མོའི་ཟླ་བར་བལྟས་ཏེ་དེས་སྒོ་ང་བཟའ་ཡི་ཡོད་པར་མཐའ་གཅིག་ཏུ་ཡིད་ཆེས་བྱས་ཀྱི་ཡོད་པ་ད་དུང་དྲན་ལ། དེ་སྐབས་མཁའ་དབྱིངས་ཡོངས་རྫོགས་ལ་ཞིབ་ཚགས་པོར་ལྟ་སྐབས་ཁ་དོག་སྣ་ཚོགས་ཀྱིས་བརྒྱན་པའི་སྐར་ཚོགས་རྣམས་མཐོང་། འོན་ཀྱང་ད་ལྟ་ནམ་ཞིག་མཚན་མོ་གནམ་ལ་ལྟ་བ་ན། སྔར་གྱི་སྐར་ཚོགས་ཀྱི་ཁ་དོག་རྣམས་གཏན་ནས་མེད་པར་གྱུར་ཟིན་འདུག དེ་དང་ལྷན་ཅིག་ཏུ་སྔར་གྱི་བག་ཆགས་དང་འཁྲུལ་སྣང་རྣམས་ཀྱང་ཡལ་ནས་ཕ་མཐར་ཕྱིན་ཚར་གདའ།

མི་ཚོས་ཁ་རྒྱུན་ལ་ནམ་ཞིག་ང་ཚོ་རྒས་པ་ན་དྲན་ཤེས་ཉམས་ཤིང་བྱིས་པའི་སྤྱོད་ཚུལ་འཆང་བར་གྲགས། གལ་ཏེ་ཁ་རྒྱུན་དེའི་དོན་ང་ཚོ་རྒས་རིམ་བཞིན་རང་ཉིད་བྱིས་པའི་སྐབས་ཀྱི་དྲན་ཤེས་དང་ཉེ་སར་འགྲོ་བའི་དོན་ཡིན་ན། དེ་ནི་བདེན་པར་མངོན། ཟླ་བའི་སྒྲུང་དེ་ལོ་བཞི་བཅུའི་གོང་དུ་བདག་གིས་ཐོས་པས། སྒྲུང་དེ་ཡོངས་རྫོགས་དྲན་ལམ་ལས་ཡལ་ཚར་གྲབས་ཡོད་ནའང་ན་ནིང་གློ་བུར་དུ་སྒྲུང་དེའི་འོད་སྣང་ཙམ་ཞིག་བློ་ངོར་ཤར་བས། སྒྲུང་ཆ་ཚང་ཉན་འདོད་ལངས་ནས་དེའི་སྐོར་ཞིབ་འཇུག་གང་འཚམ་བྱས་པ་ཡིན། མི་མང་པོ་ལ་སྐད་ཆ་འདྲི་རྩད་བྱས་ནས་ཟླ་བ་ཁ་ཤས་འགོར་སོང་། མཐར་ངའི་གྲོང་གསེབ་ཀུར་སྟོད་ན་གནས་པའི་མི་རྒན་ཞིག་དང་ཕྲད་དེ་ཁོང་གི་དྲུང་ནས་སྒྲུང་དེའི་རིམ་པ་མི་འདྲ་བ་གཞན་དང་གཞན་ཡང་ཡོད་པ་རྣམས་ཀྱང་ཉན་པ་ཡིན།

འབྲུག་དང་སི་ཀིམ་ཁུལ་དུ་འཚར་ལོངས་བྱས་པའི་ཕྲུ་གུ་ཞིག་ཡིན་པས། ཡུལ་ལུང་དེ་ན་སྒྲུང་གཏམ་བཤད་པ་ལ་བྱང་ཆུབ་པའི་སྐྱེས་བུ་དུ་མ་ཞིག་ཡོད་པས་ཁོང་རྣམས་ལ་ཁོ་བོས་ལན་གྲངས་དུ་མར་སྒྲུང་བཤད་རོགས་ཞེས་རེ་སྐུལ་ཞུས་པ་ཡིན། འབྲུག་གི་ཕྲུ་གུ་ཚོས་སྒྲུང་གཏམ་བཤད་པར་རེ་བ་ཞུ་སྐབས་བེད་སྤྱོད་བྱེད་པའི་ཀུར་སྟོད་པའི་སྐད་དེ་ལ་དོན་དག་ཧ་ཅང་ཟབ་པོ་ཞིག་ཡོད། ཁོང་ཚོས་ཚིག་གཞན་དང་སྦྱར་ནས་ “རུང་མ་དེ་བཤིག་བི།” ཞེས་ཟེར། དེ་དག་ལས་ “རུང་མ་” ཞེས་པ་ནི་མདུད་པའམ་བསྡམ་པའི་དོན་ཡིན་ལ། “བཤིག་བི་” ཞེས་པ་ནི་སྐུ་མཁྱེན་ཤིགས་དང་ཞེས་པའི་དོན་ཡིན། ཚིག་གཞན་གྱི་ཐོག་ནས་ཞུས་ན། དོན་ངོ་མར་ཁོང་ཚོས་ཐུམ་སྒྲིལ་ཞིག་ཁ་ཕྱེ་བར་རེ་སྐུལ་ཞུ་ཡི་ཡོད། མདོར་ན་སྒྲུང་གཏམ་དེ་ཕྱི་རོལ་དུ་འཐོན་པའི་ཆེད་དུ་མདུད་པ་དཀྲོལ་བའི་དོན་ནོ།། སྒྲུང་བཤད་པ་པོས་སྒྲུང་གཏམ་བཤད་རྒྱུར་ཁས་བླངས་ན་ང་ཚོ་ཕྲུ་གུ་རྣམས་ཀྱིས་ཐམས་ཅད་དོར་ནས་ཉིན་མོ་ཡིན་ན་ཡང་མལ་ཆས་དྲོ་བོ་ཞིག་གིས་དཀྲིས་ཏེ་མཉམ་དུ་འཛོམས་ནས་ཧང་སང་སྟེ་བསྡད།

རྗེ་བཙུན་སྒྲོལ་མའི་སྤྲུལ་པ་ཡིན་པའི་ཁྱི་ཞིག་གིས་ཕྲུ་གུ་གཅིག་ལ་མི་ཚེའི་ཉམས་མྱོང་འདྲ་མིན་གསག་པའི་ཆེད་དུ་ས་ཕྱོགས་གང་སར་འགྲོར་བཅུག་པའི་སྒྲུང་ཞིག་ཡོད། ངས་ད་དུང་ཡང་སྒྲུང་དེ་དྲན་གསོ་བྱ་ཐབས་བྱེད་ཀྱི་ཡོད། སླར་ཡང་མཛའ་མཐུན་ཡིད་བཅུགས་ཀྱི་གྲོགས་པོ་བཞི་སྟེ། གླང་ཆེན། སྤྲེའུ། རི་བོང་། བྱིའུ་བཅས་ཁོང་རྣམས་མཐུན་འབྲེལ་གྱི་ངང་ནགས་གསེབ་ཅིག་གི་ནང་དུ་ཇི་ལྟར་གནས་མིན་གྱི་སྒྲུང་ཞིག་ཀྱང་ཡོད། ནགས་གསེབ་དེར་ཤིང་འབྲས་མི་བཟད་པ་བྱིན་པའི་ཤིང་སྡོང་ཆེན་པོ་ཞིག་ཡོད། འོན་ཀྱང་ཤིང་སྡོང་དེ་ཧ་ཅང་རིང་པོ་ཡོད་པས་ཁོང་ཚོ་སུས་ཀྱང་ཤིང་འབྲས་ལེན་པར་མི་རྙབ། སྒྲུང་རིང་པོ་དེ་མདོར་བསྡུས་ནས་བཤད་ན། གླང་ཆེན་གྱི་སྟེང་དུ་སྤྲེའུ་དང་། སྤྲེའུའི་སྟེང་དུ་རི་བོང་། རི་བོང་གི་སྟེང་དུ་བྱིའུ་འཛེགས་ཏེ་བྱིའུས་ཤིང་ཏོག་བཀོག་ནས་རི་བོང་དང་། རི་བོང་གིས་སྤྲེའུ་ལ། སྤྲེའུས་གླང་ཆེན་ལ་སྤྲོད་རེས་བྱས་ནས་ཚང་མས་ཤིང་ཏོག་ལོངས་སུ་སྤྱོད་རྒྱུར་རྙེད། གཅིག་གི་སྟེང་ལ་གཅིག་འཛེགས་ནས་ཤིང་ཏོག་བཀོག་པའི་ཐབས་ཤེས་དེ་བྱིའུའི་བསྟན་ལ། བྱིའུ་དེ་ཡང་སངས་རྒྱས་ཀྱི་སྐུ་སྐྱེ་སྔ་མ་ཡིན་པར་འགྲེལ་བརྗོད་བྱས། སྒྲུང་དེའི་བསླབ་བྱ་ནི། གཤོག་པ་ཡོད་པ་དང་། མཆེ་བ་ཡོད་པ་སོགས་སེམས་ཅན་ཆེ་ཆུང་ཅི་འདྲ་ཡིན་རུང་། གལ་ཏེ་ཚང་མ་ཆིག་སྒྲིལ་གྱིས་མཉམ་ལས་བྱས་ན་ཐག་རིང་ས་ན་ཡོད་པའི་ཤིང་ཏོག་ཀྱང་ལེན་ཐུབ་པའམ་འདོད་པའི་དོན་ཅི་འདྲ་ཞིག་ཡིན་ཡང་བསྒྲུབ་ཐུབ་པའི་དོན་ཡིན།

དེ་བཞིན་སྐད་ཆ་བཤད་པའི་རལ་གྲི་དང་། མིག་གཉིས་མདུན་དང་མིག་གཉིས་རྐུབ་ལ་ཡོད་པའི་རྟ་མིག་བཞི་པ་ཅན་མངའ་བའི་གླིང་གེ་སེར་རྒྱལ་པོའི་སྒྲུང་དེས་ཟླ་བ་ནས་ཟླ་བའི་བར་མུ་མཐུད་ནས་ང་ཚོའི་ཡིད་དབང་འགུག་པར་བྱས།

དེ་ནས་བཟུང་སིན་ཌི་རེ་ལ་ (Cinderella) དང་ཧེ་རི་པོ་ཊར་ (Harry Potter) དེ་བཞིན་ཨེ་ལི་སི་དང་འོན་ཌར་ལེན་ (Alice in Wonderland) ལྟ་བུའི་སྒྲུང་རྣམས་ཀྱིས་ངའི་ཡིད་དབང་འཕྲོགས། ད་ནི་གནད་དོན་མེད་པ་དང་། རྙོག་ཟིང་མེད་པ། དེ་བཞིན་འཐབ་མོ་མེད་པའི་སྒྲུང་རྣམས་ཀྱི་དུས་ཚོད་རྫོགས་ཟིན་པ་འདྲ། ངའི་རེ་འདུན་ནི་མ་འོངས་པའི་ཕྲུ་གུ་རྣམས་ཀྱིས་མདུད་པ་བཤིག་པའི་ཉམས་མྱོང་ཞིག་ཐོབ་ན་སྙམ་པ་དེ་ཡིན།

འདིར་དགོད་བྲོ་བ་དང་གནད་གལ་ཅན་གྱི་སྐད་ཆ་གང་ཡང་མེད། གང་ཡིན་ཟེར་ན་སྐབས་འདིར་གནད་དོན་གང་ཡང་སྟོན་རྒྱུ་མེད་པའི་སྒྲུང་གི་སྐོར་ཞིག་བཤད་པའི་སྐབས་རེད།